Assenés chi, Grievilier

Assenés chi, Grievilier, jugement:

U quel puet miex chius se paine emploiier

Ki weut Amours par parole essauchier?

U en celui ki aime loialment

Pour chu k'il n'ait volenté ne talent

De soi cangier,

U en celui ki aimme faussement

Pour ravouer?

Adam, de chu vous jugerai briement.

En un loial a poi a preechier,

Et ensement ki est en un sentier

Pourfait k'il dist: «Alés seürement.»

Ciex fait trop miex ki sa paine despent

Au losengier

Tant com l'a fait a amer loialment

Acoragier.

Jehan de Grievilier, sor fondement

Foible et mauvais fait mauvais edefier;

Laissiés le faus amant a justicier

Si vous metés a celui qui ne ment;

C'on voit par defaute d'enseignement

Maint desvoiier

Et mainte tour ki n'a retenement

Adamagier.

Adan, sachiés que mal ot qui n'entent

Et mal entent c'on ne puet consillier;

Teus fait trop mains ki loe un bon ouvrier

Ke ne fait cius qui a ouvrer l'aprent.

Qui chou ne set ne voit pas clerement,

Pour droit jugier,

N'il n'est pas plains de bon entendement,

Au mien cuidier.