Donna pos vos ay chausida
Anonymous
Donna pos vos ay chausida
Faz me bel semblan
Qu'ieu suy, a tota ma vida,
A vostre coman.
A vostre coman seray
A totz los jors de ma via,
E ja de vos non partray
Per degun'autra que sia.
Que Erex non amet Enida
Tan ni Yseutz Tristan
Con yeu vos, donna grasida,
Qu'ieu am sens engan.
Donna pos vos ay chausida
Faz me bel semblan
Qu'ieu suy, a tota ma vida,
A vostre coman.