Quant voi la fleur nouvele

Quant voi la fleur nouvele

Paroir en la praele

Et j'oi la fontenele

Bruire seur la gravele,

Lors mi tient amors nouvele

Dont ja ne garai.

Se cist maus ne m'asoage

Bien sai qu'en morai.

«Je sui sade et brunete

Et jone pucelete;

S'ai coleur vermeillete,

Euz verz, bele bouchete;

Si me point la mamelete

Que n'i puis durer.

Reson est que m'entremete

Des douz maus d'amer.

«Certes, se je trouvoie

Qui m'en meïst en voie,

Volentiers ameroie;

Ja por nul nel leroie.

Car bien ai oï retrere,

Et por voir conter,

Que nus n'a parfete joie

S'el ne vient d'amer.»

Vers la tose m'avance

Por oïr s'acointance;

Je la vi bele et blanche,

De simple contenance.

Ne mist pas en oubliance

Ce que je li dis.

Maintenant, sanz demorance,

S'amor li requis.

Pris la par la main nue,

Mis la seur l'erbe dure;

Ele s'escrie et jure

Que de mon gieu n'a cure:

«Ostéz vostre lecheüre!

Dex la puist honir!

Car tant est asprete et dure

Ne la puis souffrir.»