Dieu! qu'il la fait bon regarder!

Dieu! qu'il la fait bon regarder,

La gracieuse bonne et belle;

Pour les grans biens que sont en elle,

Chascun est prest de la louer.

Qui se pourroit d'elle lasser?

Tousjours sa beauté renouvelle.

Dieu! qu'il la fait bon regarder,

La gracieuse bonne et belle!

Par deça, ne delà, la mer,

Ne scay dame, ne damoiselle

Qui soit en tous biens parfais telle!

C'est un songe d'y penser.

Dieu! qu'il la fait bon regarder!