Propheta mendax

Heriger, urbis Maguntiensis

Antistes, quondam vidit prophetam

Qui ad infernum se dixit raptum.

Inde cum multas referret causas

Subiunxit totum esse infernum

Accinctum densis undique silvis.

Heriger illi ridens responsit

'Meum subulcum illuc ad pastum

Nolo cum macris mittere porcis.'

Vir ait falsus: 'Fui translatus

In templum celi, Christumque vidi

Laetum sedentem et comedentem.

Ioannes Baptista erat pincerna,

Atque preclari pocula vini

Porrexit cunctis vocatis sanctis.'

Heriger ait: 'Prudenter egit

Christus Iohannem ponens pincernam,

Quoniam vinum non bibit unquam.

Mendax probaris cum Petrum dicis

Illic magistrum esse cocorum;

Est quia summi ianitor celi.

Honori quali te Deus celi

Habuit ibi? Ubi sedisti?

Volo ut narres quid manducasses.'

Respondit homo: 'Angulo uno,

Partem pulmonis furabar cocis;

Hoc manducavi atque recessi.'

Heriger illum iussit ad palum,

Loris ligari scopisque cedi,

Sermone duro hunc arguendo:

'Si te ad suum invitet pastum

Christus, ut secum capias cibum,

Cave ne furtum facias spurcum.'

(Haec Herriger dixit,

Antistes urbis Maguntiensis.)