Por conforter mon corage
Ernoul
Por conforter mon corage
Qui d'Amors s'esfroie,
L'autre jor les un boschage
Toz seus chevauchoie.
Pastorele
Gente et bele
Truis et simple et coie.
En l'erboie
Qui verdoie
Repaissoit sa proie.
Cors ot gent
Et avenant,
Bouche vermeille et oel riant,
Noirs sorcis
Et bien assis,
Blanc col et coloré le vis,
Quar nature
Mist sa cure
En former tel enfant.
A! E! O!
Son frestel, son baston prent,
A! E! O!
Chantoit et notoit:
«Je voi venir Emmelot
Par mi le vert bois».
J'oi la touse qui frestele
Et demaine joie;
Por ce qu'ele est simple et bele
Vers li ting ma voie.
Je li dis
Com fins amis:
«Touse, car soiez moie!»
La bergiere,
Qui fu fiere,
Durement s'esfroie.
Maintenant
S'amor demant;
El dit que n'en fera noiant.
De Robin
A fait ami
Qui li a juré et plevi
Que sa vie
D'autre amie
N'avra los ne cri.
A! E! O!
«Robins est loiaus amis.
A! E! O!
Traiez vos en la!
Robins m'a de cuer amee
Si nel lairai ja.»
«Jentix touse debonaire,
Preus sanz vilenie,
Ne m'i faites plus contraire:
Devenez m'amie.
Cote noire,
C'est la voire,
Ne vos donrai mie;
D'escarlete
Iert vermeillete,
De vert mi partie.»
Ele dit:
«Traiez arrier!
N'i vaut vostre desnoier».
Je la pris,
Qui fui soupris,
Par force soz moi la mis;
Demanois
Le ju françois,
Li fis a mon talant.
A! E! O!
«Touse, or est il autremant?»
A! E! O!
Cele crie en haut:
«Se Robins m'a mal guardee
Maldehait qui chaut».