Als noch'n Schoppe
F. Abt
O Wein du bischt e' lieber Freund,
Dei' Sunn' wann in mei' Gläsche' scheint,
So soll's drauß wettre', wie's nor mag,
Mir is, als wär' der schönschte Tag.
Als noch 'n Schoppe!
'S laaft in der Welt so Mancher 'rum,
Der sicht nit grad, sicht Alles krumm;
O Freund, so eener kennt dich nit,
Sunscht stünd's wohl nit so schlimm d'rmit.
Als noch 'n Schoppe!
Uf dich, mei' Schatz, verloß' ich mich,
Un'will der Griesgram rühre' sich,
Du weescht mer g'schwind 'n Rooth d'rvor
Un'bischperscht mer vertraut in's Ohr:
"Als noch 'n Schoppe!"
Die Lieb is gar e' korz Gedicht
Un' 's Lebe is e' langi Gschicht',
Du helfscht zu allezwee getreu
Un bischt deß Beschte oft d'rbei.
Als noch 'n Schoppe!
Wann ich e' Weltverbeßrer wär',
Mit dir verbunne' wär's nit schwer,
Zu Aller Wohl dictirt' ich dann:
Kund un'zu wisse' Jedermann:
"Als noch 'n Schoppe!"