Ständerl

D'Sternderln schein'nt Paar und Paar

Heunt noch so hell und klar,

Zoägnt mär ön Wög schnurgrads

He zä mein 'n Schatz.

Dirnderl, steh auf von Bött,

Dirnderl, geh scheu di nöt!

Säh' deini Äugerln gern,

Schenä, wie d'Stern!

Und dä Herr Mon scheint meh

Gar so schen voll in See!

Voll is mein Herzerl heut,

Voll is 's vä Freud!

's Nachtigall-Mänderl schlagt,

Los' ä weng zue, was 's sagt?

Blaudert so fein und zart

Liebvolli Wort'.

Und ä mein Herzerl schlagt,

Weil's ä Välangä tragt,

Und das tragt's spat und früeh

Allweil zä dir!

Früeh vä dä Morigureth,

Bis dä Tag awi geht,

Und dö ganz Nacht dahin

Liegst mär in Sinn!

B'säß i dö Länder heunt,

Wo dä Herr Mon hin scheint:

Wärst avä du nöt mein,

Kunnt's mi nöt g'freun!

Und kunnt' än ieder Stern

Glei ä ganz' Duzät wern,

Wärst mä do du um all

Dennä nöt fal.

Dirnderl, steh auf von Bött!

I han mein 'n Kopf väwött,

Daß i ä Bußerl krieg,

Wann i di sieg!