Was brucht e rächte Schwyzerma?

Was brucht e rächte Schwyzerma?

Das sell mer Öpper säge!

Er muess 'nes eiges Hüsli ha

Mit glänzige Schybe-n-und Meie dra,

E guete Schärme Tag und Nacht,

Im Sunneschyn und Räge.

Was brucht e rächte Schwyzerma?

Das sell mer Öpper säge!

Er muess-n-es subers Wybli ha,

Das hilft em 's Güetli zäme ha,

Es macht em öppe churzi Zyt

Und hilft em 's Ungfell träge.

Was brucht e rächte Schwyzerma?

Das sell mer Öpper säge!

'n-es Pärli Chinder, oder zweu,

Wo gsundi roti Bäckli hei,

Sie träge-n-eim e heitre Blick

Und Sunneschyn ergäge.

Was brucht e rächte Schwyzerma?

Das sell mer Öpper säge!

Ne subre Tisch und blangge Schild,

n'es härzhafts Wort, wo öppis gilt,

E-n-eigni Meinig öppenmol,

Wo d'Wohret ma verträge.

Was brucht e rächte Schwyzerma?

Das seil mer Öpper säge!

'n-es subers Gwehrli a der Wand,

'n-es heitern Lied fürs Vatterland,

Es offnigs Härz, e heitre Blick

Uf Wäge-n-und uf Stäge.