Beware o' bonnie Ann

Ye gallants bright, I rede ye right,

⁠ Beware o' bonnie Ann;

Her comely face sae fu' o' grace,

⁠ Your heart she will trepan.

Her een sae bright, like stars by night,

⁠Her skin is like the swan;

Sae jimply laced, her genty waist,

⁠ That sweetly ye might span.

Youth, grace, and love, attendant move,

⁠ And pleasure leads the van;

In a' their charms, and conquering arms,

⁠ They wait on bonnie Ann.

The captive bands may chain the hands,

⁠But love enslaves the man;

Ye gallants braw, I rede ye a',

⁠ Beware o' bonnie Ann.