Chanson LXXXII

Yver, vous n'estes qu'un villain.

Esté est plaisant et gentil,

En tesmoing de May et d'Avril

Qui l'acompaignent soir et main.

Esté revest champs, bois et fleurs,

De sa livrée de verdure

Et de maintes autres couleurs,

Par l'ordonnance de Nature.

Mais vous, Yver, trop estes plain

De neige, vent, pluye et grezil;

On vous deust bannir en exil.

Sans point flater, je parle plain,

Yver, vous n'estes qu'un villain.