A la douçor de la bele seson

A la douçor de la bele seson,

Que toute riens se resplent en verdor,

Que sont biau pré et vergier et buisson

Et li oisel chantent deseur la flor,

Lors sui joianz quant tuit lessent amor,

Qu'ami loial n'i voi mes se moi non.

Seus vueil amer et seus vueil cest honor.

Mult m'ont grevé li tricheor felon,

Mes il ont droit, c'onques ne·s amai jor.

Leur deviner et leur fausse acheson

Fist ja cuidier que je fusse des lor;

Joie en perdi, si en crut ma dolor,

Car ne m'i soi garder de traïson;

Oncore en dout felon et menteor.

Entor tel gent ne me sai maintenir

Qui tout honor lessent a leur pouoir:

Tant com je m'aim, les me couvient haïr

Ou je faudrai a ma grant joie avoir.

C'est granz ennuis que d'aus amentevoir,

Mes tant les hé que ne m'en puis tenir;

Ja leur mestier ne leront decheoir.

Or me dont Deus ma dame si servir

Q'il aient duel de ma joie veoir.

Bien me devroit vers li grant lieu tenir

Ma loiauté, qui ne puet remanoir;

Mes je ne puis oncore apercevoir

Qu'ele des biens me vuelle nus merir

Dont j'ai sousfert les maus en bon espoir.

Je n'en puis mes se ma dame consent

En ceste amour son honme a engingnier,

Car j'ai apris a amer loiaument,

Ne ja nul jour repentir ne m'en qier;

Si me devroit a son pouoir aidier

Ce que je l'aim si amoureusement,

N'autre ne puis ne amer ne proier.

Li quens Jofroiz, qui me doit consoillier,

Dist qu'il n'est pas amis entierement

Qui nule foiz pense a amour laissier.