Cil qui d'amours

Cil qui d'amours me conseille

Que de li doie partir,

Ne set pas qui me resveille

Ne dont sont mi grief sospir.

Petit a sens et voisdie

Cil qui m'en veut chastier,

N'onques n'ama en sa vie;

Si fet trop nice folie

Qui s'entremet du mestier

Dont il ne se set aidier.

Hé! blanche, clere et vermeille

De vous sont mi grief souspir,

Car fetes en tel merveille

Droiture et Reson faillir.

Quant je vous vueil a amie

Droit nel porroit consentir,

Car vostre grant courtoisie,

De tres grant biauté garnie,

Ne m'i daigne conseillier.

Mar vous oï tant prisier.

Povre cuer se desconseille

Et let de poor morir;

Li viguereus s'apareille

En biau confort de guerir.

Dame, mes riens que je die

Ne me vaut, car je sorqier;

S'un petit de vilanie,

Esprise de felonnie,

Vous fet merci delaier,

Mar vous vi et ma mort qier.

Dedenz mon cuer monte treille

Toute preste de florir:

Bone amour fine et freille,

Qui la daigneroit joir.

Mes amours qui n'est joïe

Ne puet cuer esleecier;

Bien voi, se mort ne chastie

Ma volenté, m'anemie,

Ne puis mon biau tort lessier,

Ne mon outrage changier.