De bien amer grant joie atent

De bien amer grant joie atent

Car c'est ma greigneur envie.

Et sachiez bien certainement

Qu'Amours a tel seignorie

Qu'a double guerredone et rent

Celui qui en li se fie,

Et cil qui d'amer se repent

S'est bien traveilliez por noient.

Onques ne fis a encient

Vers Amours sens ne folie

Ainz sui en son conmandement

Et serai toute ma vie.

Cil remaint enuieusement

De qui Amours est partie;

Ma dame m'ensaigne et aprent

Qu'eneurs est d'amer loiaument.

Grant amor ne me puet grever:

Quant plus m'ocit, plus m'agree.

Et melz vuel morir et amer

Q'un jor vos aie oubliee

Dame, qui me poëz doner

Ma grant joie desirree.

Ce me fet souvent conperer

Que vers vos n'ose regarder.

Dame, de toutes la nonper,

Bele et bone, a droit loee,

Ja ne devriez escouter

Fausse gent malëuree

Qu'a mentir et a deviner

Ont Bone Amour destorbee

Qui puis ne savoit assener

La ou ele deüst aler.