Desconfortez, plains de dolor
G. Brulé
Desconfortez, plains de dolor et d'ire,
M'estuet chanter, qu'ailleurs n'ai ou entende;
Tot le mont voi, fors moi, joer et rire,
Ne je ne truis qui d'ennui me desfende.
Cele m'ocit qui mes cuers plus desirre,
Si sui irez quant ele n'en amende.
Chascuns dit q'il aime autresi;
Pour ce ne conoist on l'ami.
El ne sent pas mon duel ne mon martire,
Por ce m'estuet qu'a sa merci atende;
Touz faus amanz par qui ma joie enpire
Pri je a Dieu qu'en enfer les descende.
«J'aim», fet chascun; grant loisir ont du dire:
Mes pou en voi qui a Amors entende.
Chascuns dit q'il aime autresi;
Pour ce ne conoist on l'ami.
De moi grever est Amors costumiere,
Si me fet bien por quoi de li me plaigne;
Mes a soffrir m'est la paine legiere
Se ce li plest qui a amer m'ensaingne.
Mes cuers me dit que souvent la requiere,
Mes nonauz est quant el plus me destraigne.
Chascuns dit q'il aime autresi;
Pour ce ne conoist on l'ami.
Onques ne fis vers li fausse priere,
Car je ne sai ne ja ne le m'aprengne;
La moie amors n'est mie nouveliere,
Qu'il n'est fors li nule ou mes cuers remaigne.
Se plus n'i preng, l'angoisse en est mult chiere,
Puis qu'il li plest que Amors me destraigne.
Chascuns dit q'il aime autresi;
Pour ce ne conoist on l'ami.
Gasçez a son chanter feni
Qui touz jorz aime et n'a merci.