Quant define fueille et flor

Quant define fueille et flor

Que voi la froidure entrer,

Lors chant a guise de plor

Qu'autrement ne puis chanter.

Mes a la gent vueil monstrer

Se ma dame a grant honor

De son bon ami grever.

Mes cuers me fet grant iror

Qui ne m'en lesse torner;

Ançois double chascun jour

Son vouloir de moi lasser.

Quant loisir ai d'esgarder,

Seigneurs, se je faz folor,

Mult me par devroit peser.

Se je l'aim de fine amour

Je n'en faz pas a blasmer,

Qu'en li a tant de valor

Que ne la puis trop amer;

Mes pour Dieu li vueil mander

Que tant m'ost de ma dolor

Que l'autre puisse porter.

S'onques hons merci trouva

Je n'i doi mie faillir;

Onques mes riens tant n'ama

Com je faz en lonc consir.

Si ne me doi repentir:

Com cil qui tant servi a

Ne doit perdre pour souffrir.

Ja nului tort ne fera

S'ele m'i lesse morir;

Que siens sui, si m'ocirra

Quant li vendra a plesir;

N'Amours n'en doit pas mentir

Puis qu'ele a li me dona.

Bien me doi en ce tenir.