E vui durmiti ancora

Lu suli è già spuntatu 'ntra lu mari

e vui bidduzza mia durmiti ancora.

L'aceddi sunnu stanchi di cantar

e affriddati, v'aspettanu cca.

Supra 'ssu balcuneddu su pusati

e aspettunu quann'è cca v'affacciati.

Li ciuri senza vui non ponu stari

su tutti ccu li testi a pinnuluni,

ognunu d'iddi non voli sbucciari.

Su prima non si grapi 'ssu balcuni,

dintra lu buttuneddu su ammucciati

e aspettunu quann'è cca v'affacciati.

Lassati stari non durmiti cchiui!

ca 'mmenzu ad iddi dintra sta vanedda

cci sugnu puri iù c'aspettu a vui...

pri vidiri ssa facci accussi bedda,

passu ccà fora tutti li nuttati

e aspettu sulu quannu v'affacciati.