Je veux aymer ardentement

Je veux aymer ardentement:

Aussi veux-je qu'egallement

On m'ayme d'une amour ardante.

Toute amytié froidement lente,

Qui peut dissimuler son bien

Ou taire son mal ne vaut rien:

Car faire en amour bonne mine,

De n'aymer point c'est le vray signe.

Les amants, si froids en esté,

Admirateurs de chasteté,

Et qui, morfondus, petrarquisent,

Sont toujours sots, car ils mesprisent

Amour, qui de sa nature est

Ardant e prompt, et à qui plait

De faire qu'une amitié dure,

Quand elle tient de sa nature.