Amoureux suy

Amoureux suy, et me vient toute joye

En esperant que vo bonté m'envoye

Un doulx confort pour mon cuer resjouir

D'un seul regart; aultre rien ne desir

Puisque d'amer m'avés en la voye.

C'est trestout ce que demander voudroye,

Cest' liesse que querir je savoie,

Toutes les foys que je vous puis veir.

Amoureux suy, et me vient toute joye

En esperant que vo bonté m'envoye

Un doulx confort pour mon cuer resjouir

Car par ma foy, quelque part que je soye,

Autre de vous amer je ne pouroye.

Vous estes celle que adés veul servir.

Vous estes tout mon joyeux souvenir,

Hores et tousjours trés douce, simple et coye.

Amoureux suy, et me vient toute joye

En esperant que vo bonté m'envoye

Un doulx confort pour mon cuer resjouir

D'un seul regart; aultre rien ne desir

Puisque d'amer m'avés en la voye.