Adieu ces bon vins de Lannoys

Adieu ces bon vins de Lannoys,

Adieu dames, adieu borgois,

Adieu celle que tant amoye,

Adieu toute playssante joye,

Adieu tout compaignons galois.

Je m'en vois tout arquant des nois

Car je ne truis feves ne pois,

Dont bien souvent au cuer m'ennoye.

Adieu ces bon vins de Lannoys,

Adieu dames, adieu borgois,

Adieu celle que tant amoye.

De moy serés par plusieurs fois

Regretés par dedans les bois

Ou il n'y a sentier ne voye;

Puis ne scaray que faire doye,

Se je ne crie a haute vois:

Adieu ces bon vins de Lannoys,

Adieu dames, adieu borgois,

Adieu celle que tant amoye,

Adieu toute playssante joye,

Adieu tout compaignons galois.