Ce jour le doibt, aussi fait la saison

I.

Ce jour le doibt, aussi fait la saison,

Et le prince d'amours l'a comandé:

Que tout home, voillant acquerir non

De vray amant, viengne par amisté

Pour reciter balade gracieuse

Que soit plaisante a sa damme amoureuse,

Et se tiengne gracieuse et joly

Joyeusement paré de quelque may,

Et il aura gueredon de par ly

Le premier jour de ce doulx moys de may.

II.

Quant est de moy, je ne doy par raison

A ce faillir, car bien gueredoné

Suy par amours de dame de renom,

Qui me donne toute joieuseté.

Quant j'aperchoy sa biaulté merveilleuse,

Son doulx regart, sa colour precieuse,

Son doulx parler et son maintien aussy,

Je ne poroye avoir soussy n'esmay,

Dont j'ay cause de joye estre garni

Le premier jour de ce doulx moys de may.

III.

Et puisqu'ensy suy saisi de tel don,

N'est ce raison que la serve a son gré,

De voulenté sans nulle mesprison?

Et en prison fusse bien enfermé.

Sy suy fermé comme a la plus joyeuse

Qui soit jusques a Muese ny a l'Euse.

Tant qu'aray cuer party par nul party,

Jamais ne changeray car, pour vray, l'ay

Sur toute autre belle et bonne chosy,

Le premier jour de ce doulx moys de may.

Envoi

Prince joly, je defy de soussy,

Car j'ay, pour vray, cuer gay, dont chanteray

Cecy ainsy pour cy que j'ai servy:

Le premier jour de ce doulx moys de may.