De ma haulte et bonne aventure

De ma haulte et bonne aventure,

Dont mon deul cesse,

Remercye avec ma princesse

Amour, qui m'a par pitié pure

Fait ouverture

De l'espargne de sa richesse.

I.

Apres l'ennuy de longue attente

Soubs feible espoir

Ce plaisir me paist et contente

Sans decevoir.

J'ai confort doulz pour doleur dure:

Choys de maistresse

Et secours de plaisant Josnesse,

Ou biens de grace et de nature

Sont sans mesure

Espars d'outrageuse largesse.

[De ma haulte et bonne aventure,

Dont mon deul cesse,

Remercye avec ma princesse

Amour, qui m'a par pitié pure

Fait ouverture

De l'espargne de sa richesse.]

II.

Bel Acueil entier se presente

A mon vouloir

Et pour vieil dueil joye presente

Me fait avoir.

Esperance n'est pas parjure

De sa promesse,

Car j'ay nompareille deesse

Et des biens a tel desmesure

Que je vous jure

Qu'aultre amer me seroit rudesse.

[De ma haulte et bonne aventure,

Dont mon deul cesse,

Remercye avec ma princesse

Amour, qui m'a par pitié pure

Fait ouverture

De l'espargne de sa richesse.]