Estrinez moy, je vous estrineray

- Estrinez moy, je vous estrineray,

Ma seulle amour. - De quoy? - Du cuer que j'ay

Pour vous donner ce jour de l'an nouvel;

Prenés en gré! - Si fai je, amis tres bel,

Aussy le mien a tous jours vous donray.

- Tres grant mercy, pourtant vous serviray,

Sans departir. - Or bien. - Dont sans delay

A che bon jour de joye et de revel

Estrinez [moy, je vous estrineray,

Ma seulle amour. - De quoy? - Du cuer que j'ay

Pour vous donner ce jour de l'an nouvel.]

Et allegiés mez maulx, ou je morray

Par desespoir. - Et quant? - Las, je ne scay.

Je sui feru ja mieulx que d'un coutel

De vos doulx yeulx. - Et vous fait donques tel

En verité? Je vous conforteray.

- Estrinez moy, [je vous estrineray,

Ma seulle amour. - De quoy? - Du cuer que j'ay

Pour vous donner ce jour de l'an nouvel;

Prenés en gré! - Si fai je, amis tres bel,

Aussy le mien a tous jours vous donray.]