Mon chier amy, qu'avés vous empensé

I.

Mon chier amy, qu'avés vous empensé

De rettenir en vous merancolie,

Se Dieux vous a un bon amy osté

Et dessevré de vostre compagnie?

Ne mettés pas en abandon la vie;

Priés pour luy, laissiés ce dueil aler;

Car une fois nous fault ce pas passer.

II.

Vous savés bien, contre la volunté

De Jhesucrist, ne la verge Marie,

Nuls hom ne puet, tant soit hault eslevé

De science ne de noble lignie.

Tous convenra fenir, je vous affie;

Il n'i a nul qui en puist eschaper,

Car une fois nous fault ce pas passer.

III.

Pour tant vous pri, soiés reconforté

Et recepvés en gré, je vous supplie,

Ces trois chapiaux en don de charitté;

Autre nouvel ne truis en no partie,

Puor remettre vo cuer en chiere lei.

Ne pensés plus a celui recouvrer:

Car une fois nous fault ce pas passer.

Envoi

Amis, la mort ne poons eschever;

Car une fois nous fault ce pas passer.