O gemma, lux et speculum

triplum

O gemma, lux et speculum

Totum perlustrans saeculum,

Vas almum Italiae.

Modo praesens oraculum

Tuum trahat spectaculum

Nostrum in levamine!

Sponte relinquens Graeciam

Duceris in Apuliam

Barinam gubernando.

Ab hoste tuens patriam

Coelestem tu per gloriam

Inhabitas laetando.

Pro expulsis languoribus

Fugatisque daemonibus

Populis en jubilat.

Exhaltis clamoribus

Manat liquor marmoribus:

Liniti gradiuntur,

Priscis dantur fervoribus

Qui carebant jam motibus,

Salutem sortiuntur.

Motetus

Sacer pastor Barensium,

Regule pontificium,

Nicolae praesul, audi

Has voces supplicantium

Conferendo praesidium,

Ut hiscant tuae laudi!

Abstulisti opprobia,

Talenti fulvi gratia,

Tunc duplam reddidisti.

Et Deo caeli serviens

Et populo subveniens

Cereres impartisti.

In marisque naufragio

Plebes in te devotio

Succrescit et collata

Habet vires oratio

Ac per te fraudis actio

Discedit in se data.