Pour l'amour de ma doulce amye

Pour l'amour de ma doulce amye

Ce rondelet voudray chanter,

Et de bon cuer luy presenter

Affin qu'elle en soit plus jolye.

Car je l'ay sur toutes choysie

A mon plaisir sans mal penser:

Pour [l'amour de ma doulce amye

Ce rondelet voudray chanter.]

Elle est belle, plaisant et lye,

Saige en maintieng et en parler:

Se la veul servir et amer

A mon povoir toute ma vie.

Pour l'amour [de ma doulce amye

Ce rondelet voudray chanter,

Et de bon cuer luy presenter

Affin qu'elle en soit plus jolye.]