Vostre bruit et vostre grant fame

Vostre bruit et vostre grant fame

Me fait vous amer plus que femme,

Qui de tous biens soit assouvie,

Ne ja d'autre servir envie

N'auray plus que de rendre l'ame.

En rien ne crains reproche d'ame,

Je vous tiens et tiendray ma dame

En accroissant toute ma vie.

Vostre bruit [et vostre grant fame

Me fait vous amer plus que femme,

Qui de tous biens soit assouvie.]

Et pour ce donc, ce que je clame,

C'est vostre grace sans nul blame,

Au moins, se je l'ay deservie,

Ne veuillés pas que je desvie,

Car vous perdriés part du royaulme.

Vostre bruit [et vostre grant fame

Me fait vous amer plus que femme,

Qui de tous biens soit assouvie,

Ne ja d'autre servir envie

N'auray plus que de rendre l'ame.]