Fins cuers enamourés

Fins cuers enamourés,

Vivans en esperance,

A de deduis assés;

Celui ki a fiance

Ke ja n'aura amie,

Tote joie est faillie.

Espoirs et Loiautés

Et Pensee Jolie

M'afient k'iere amés;

Raisons non, ains m'afie

D'asses doloir et plaindre;

Trop haut aim pour ataindre.

Desirs et volentés

De bien servir, sans faindre,

Et sa tres grans beautés,

Fait ma volenté graindre

D'amer d'amor veraie;

N'ai voloir k'en retraie.

Gens cors bel acesmés,

Plus pres de vous se traie

Pitié, si oubliés

Raison, car trop m'esmaie;

Mais çou me rasouaige

Ke serf boin signouraige.

Cent fois me sui loés

Ke a mon douç damaige

Sui si bien assenés.

Belle, cortoise et saige,

Merci! car miex amee

Ne fu de vous ainc nee.

Jehan Erart, chantés

Mon chant, si vous agree;

Boutillier presentés

Vous est. Si soit loee

Ma cançons; la reprise

Ai a Dragon tramise.