C'est force, faire le vueil

C'est force, faire le vueil:

Tuit mi desir

Sont et seront en servir

Vo bel accueil,

Chiere dame, et d'acomplir

Vostre dous vueil.

Car vous me faites sentir

Et conjoïr,

Par vo dous riant regart,

Un dous mal à soustenir

Que vueil souffrir

Humblement, se Diex me gart.

Mais souvent pleurent mi oueil,

Quant je remir

Vo gent corps par souvenir,

Dont mon vis mueil.

Lors de mon cuer meint souspir

Passent le sueil

C'est force, faire le vueil.

Ne je ne me puis tenir

D'einsi gemir

Celeement et à part,

Pour doubte qu'à vo plaisir

Ne puist venir

Le service, où mon cuer art,

Sans avoir peinne ne dueil;

Car se fremir,

Teindre, trambler et palir

Plus que ne sueil

Me fait et vous oubeir,

Pas ne m'en dueil.

C'est force, faire le vueil.

Ne ja ne m'en quier partir

Ne repentir

N'estre garis par nul art,

Eins vueil vostre honneur querir

Et vous cherir

Dessus toutes, main et tart;

Car vo biauté sans orgueil,

Qu'aim et desir,

Et dous espoir de merir

En tel escueil

M'ont mis qu'au goust de joïr

Mes maus recueil.

C'est force, faire le vueil:

Tuit mi desir

Sont et seront en servir

Vo bel accueil,

Chiere dame, et d'acomplir

Vostre dous vueil.

Alternate version

C'est force, faire le vueil: tuit mi desir

Sont et seront en servir vo bel accueil,

Chiere dame, et d'acomplir vostre doulz vueil.

Car vous me faites sentir et conjoir,

Par vo doulz riant regart,

Un dous mal a sous tenir que vueil souffrir

Humblement, se Dieus me gart.

Mais souvent pleurent mi oueil, quant je remir

Vo gent corps par souvenir, dont mon vis mueie

Lors de mon cuer meint soupir passent le sueil.