Contre ce dous mois de may

Contre ce dous mois de may,

Pour avoir le cuer plus gay,

Et plus joli,

Et pour celle ` qui m'ottri,

Vueil faire un lay.

Mais comment je le feray,

Moult m'esbahi,

Car trop petit sens en my

Pour le faire ay;

Ne suis dignes, bien le say,

De li loer: c'est le ray

Qui embeli

Nous ha tous et esclarcy

Dou soleil vray,

Si que ma fience avray

Si ferme en li

Toudis qu'à s'onneur einsi

Commenseray:

Dame, digne d'estre honnourée

Et par excellence aourée

Dessus toute dames passée,

A venir ou presente,

De toutes estes separée,

Si qu'autre à vous n'est comparée,

Ne plus qu'est au feu la fumée,

Tant est bele et gente.

Dame, Vierge et Mere appellée,

En ciel, en terre, en mer loée,

En gloire de Dieu couronnée,

De joie adresse et sente,

Fleur de tous biens enluminée

Estes, dont nostre vie est née.

Beneoite soit la journée

Que porta fruit tele ente.

Estes vous, tres bele,

Qui estes l'entele

Flourie et nouvelle,

Mere, où Dieu, vierge et pucelle,

Par deduit,

Einsi le cuit,

S'engendra, quant Gabriel

Vous dist la nouvelle

Qui "ave" s'apelle.

Ce nous renouvelle,

Par vous, Mere, à Dieu ancelle,

Car destruit

Estiemmes tuit

Dou pechié le pere Abel,

N'estoit cils ou celle,

Donsiaus ou donselle,

Dame ou demoiselle,

Qui n'alassent pelle melle,

A grant bruit,

Où riens ne luit:

C'est enfer, sans riens de bel,

Où Sathan revelle,

Qui par sa cautelle

Et par sa favelle

Fist perdre nostre querelle,

Quant dou fruit

De vie enduit

Adam le cruel morsel.

Bien fut celée à nature

Ceste engendreüre,

Ceste porteüre,

Ceste vierge enfanteüre,

Pour ce que la Deïté

Prist lors humainne figure

En vous, Vierge pure;

C'est chose seüre,

Car Dieu et homme figure

En une seule unité.

Mais onques mais creature

N'endura n'endure

Dolour si tres dure

Com vous, quant mors si obscure

Ot pour nous l'umanité

Dou vray Dieu, car toute injure

Et toute laidure

Ot contre droiture;

Mais sa mort crueuse et sure

Nous ha tous ressuscité.

Mais après ce desconfort,

Dame de pris,

Heüstes vray reconfort,

Quant Jhesu Cris,

Fu ressuscitez et vis

De ceste mort,

Où juis l'avoient mis

Faussement et à grant tort.

Lors Lucifer qui ne dort

Fu esbahis,

Pluto, Cerberus le fort

Et Lachesis,

Quant Diex prist ses bons amis

Par son effort

Et d'enfer en paradis

Les mist en joieus deport.

Mais un escript

Truis qui descript

De Jhesu Crit

Qu'il convenoit que il souffrist

Pour entrer en sa gloire,

Et qu'il venist

Et descendist

Et qu'il preïst,

Dame, en vous nostre humain habit.

Certes, c'est chose voire.

Car il le fit

Sans nul despit,

A tel profit

Qu'onques mais homs si grant ne vit;

Et sa noble victoire

Nous embelist,

Nous esclarcist,

Nous enrichist,

Si que à joie mors et vis

Mist; tout hom le doit croire.

Bien say que sa grief passion

Vous mist en desolation.

Or aviés consolation

Pris, quant vous fist turbation

D' "ave" la salutation,

Car ce fust l'incarnation

De Dieu et sa conception,

Singuliere à droit ditte.

Et de Herode l'evasion,

De vo chier fil l'invention,

Quant par sa disputation

Mis juis à confusion;

D'eaue en vin la mutation

Fist à vo supplication;

De digne resurrection

N'est pas joie petite.

Encor vous fist sa nation,

Tres vierge et sans corruption,

Joie et la visitation

Des pastours de la region,

Des iij rois l'adoration,

Vostre purification

Et aussi la destruction

Des ydoles d'Egypte.

Son admirable ascention,

D'Esperit Saint la mission,

Vo glorieuse assumption

Et vostre coronation

Dont j'espoir ma redemption

Monstrent en ma conclusion

Qu'estes, par droite affection,

De Dieu le pere eslite.

Si que li juif, par folour,

Vivent en trop grant errour,

D'une pierre sans liquour.

Moÿses faisoit

Yaue issir qui decourit,

Dont un peuple soustenit;

Sa verge en serpent muoit;

Ce scevent plusour.

Ne porta fruit, fueille et flour

Une verge sans humour,

Toute seche et sans verdour,

Qu'Aaron tenoit:

Ce contre nature estoit.

Aussi Diex naistre voloit

De vous Vierge et si feroit

Bien chose gringnour.

Et pour ce, sans prendre fin,

Cherubin

Et seraphin,

Tuit ange et archange

Dou commandement divin,

Sans declin,

Sont tuit enclin,

A vostre loange,

Et de Dieu tout li affin,

De cuer fin,

Soir et matin.

Pour ce à vous me range

Que ne soie, se je fin,

Par l'engin

Mis en hutin

De Sathan l'estrange.

Hé! Vierge roÿne,

Estoile de mer,

Qui tout enlumine,

Vous doy bien clamer,

Qu'à joieus termine

Comment terminer

Qui à vo doctrine

Se vuet doctriner;

De grace enterine,

Douce sans amer,

De bonté racine,

Flour qu'on doit amer,

Amour vraie et fine,

Qui ne puet finer

Et qui ne decline

Ne puet decliner.

Fruit et medecine

Pour tous maus curer,

Par tel vertu qui ne

Porroit empirer,

Fonteinne divine

Pour pechiés laver,

Rose sans espine,

Douce à oudourer,

Vous estes la mine

Qu'on ne puet miner,

Quar qui plus y mine,

Plus a à miner;

Qui à vous s'encline

Et vuet enciner,

Il faut que bien fine,

S'il ha à finer.

De grace riviere et puis

Qu'espuisier

Homs par puisier

Ne puet nullement,

Et de nostre sauvement

Le sourt et la duiz,

Bien est duis

Qui ses deduis

Prent de cuer entier

En vous servir et prier

Tres devotement

Et souvent,

Car vraiement

Plus ne voy ne truis.

Vierge, vo grace ne puis

Esprisier

Ne trop prisier,

Car en un moment

Ce mil fois plus en descent,

Plus de vous ce muis.

S'en suis vuis,

Je sui destruis,

Car, à droit jugier,

Vos chiers Fils ame n'a chier

Sans li; et briefment,

Pour ce prent

M'ame humblement

A vous ses refuis.

Et se vostre grace n'ay,

Dont je suis en grant esmay,

Vierge, mar vi

Le terme que je nasqui.

Las! où iray,

Que feray, que devenray?

Tout en fermi,

Car pas ne l'ay desservi;

Pour ce m'esmay.

Secondement, mors seray,

Se je y fail; mais je metteray

Tout en oubli

Pour vous que j'ay po servi.

Je penserai

A vous et vous serviray,

Se Diex plaist, si

Qu'il avra pité de mi,

Quant je morray.