Dame, je sui cils qui vueil endurer

Motetus

Dame, je sui cils qui vueil endurer

Vostre voloir, tant com porray durer;

Mais ne cuit pas que longuement l'endure

Sans mort avoir quant vous m'estes si dure

Que vous volés qu'ensus de vous me traie,

Sans plus veoir la tres grant biauté vraie

De vo gent corps qui tant a de valour

Que vous estes des bonnes la millour.

Las! einsi ay de ma mort exemplaire.

Mais la doleur qu'il me convenra traire

Douce seroit, s'un tel espoir avoie

Qu'avent ma mort par vo gré vous revoie.

Dame, et se ja mes cuers riens entreprent

Dont mes corps ait honneur n'avancement,

De vous venra, com lonteins que vous soie,

Car ja sans vous que j'aim tres loyaument

Ne sans Amours emprendre nel saroie.

Triplum

Fins cuers dous, on me deffent

De par vous que plus en voie

Vostre dous viaire gent

Qui d'amer m'a mis en voie;

Mais vraiement, je ne sçay

Comment je m'en atendray

Que briefment morir ne doie.

Et si m'en faut astenir

Pour faire vostre plaisir,

Ou envers vous faus seroie,

S'aim trop miex ma loyauté

Garder et par vostre gré

Morir, se vos cuers l'ottroie,

Qu'encontre vostre voloir,

Par vostre biauté veoir,

Receüsse toute joie.

Tenor

Fins cuers dous.