De Fortune me doi pleindre et loer

De Fortune me doi pleindre et loer,

Ce m'est avis, plus qu'autre creature;

Car quant premiers encommencay l'amer,

Mon cuer, m'amour, ma pensée, ma cure

Mist si bien à mon plaisir

Qu'à souhaidier peüsse je faillir,

N'en ce monde ne fust mie trouvée

Dame qui fust si tres bien assenée.

Car je ne puis penser n'imaginer

Ne dedens moy trouver qu'onques Nature

De quanqu'on puet bon et bel appeller

Peüst faire si parfaite figure

De celui ou mi desir

Sont et seront à tous jours sans partir;

Et pour ce croy qu'onques mais ne fut née

Dame qui fust si tres bien assenée.

Lasse! or ne puis en ce point demourer,

Car Fortune qui onques n'est seüre

Sa roe veut encontre moy tourner

Pour mon las cuer mettre à disconfiture.

Mais en foy, jusqu'au morir

Mon dous amy vueil amer et cherier,

Qu'onques ne dut avoir fausse pensée

Dame qui fust si tres bien assenée.