Fons totius superbie

Fons totius superbie,

Lucifer, et nequicie

Qui, mirabili specie

Decoratus,

Eras in summis locatus,

Super thronos sublimatus,

Draco ferus antiquatus

Qui dicere

Ausus es sedem ponere

Aquilone et gerere

Te similem in opere

Altissimo.

Tuo sed est in proximo

Fastui ferocissimo

A judice justissimo

Obviatum.

Tuum nam auffert primatum;

Ad abyssos cito stratum

Te vidisti per peccatum

De supernis.

Ymis nunc regnas infernis;

In speluncis et cavernis

Penis jaces et eternis

Agonibus.

Dolus et fraus in actibus

Tuis et bonis omnibus

Obviare missilibus

Tu niteris;

Auges que nephas sceleris

Adam penis in asperis

Te fuit Stigos carceris.

Sed Maria

Virgo, que, plena gratia,

Sua per puerperia

Illum ab hac miseria

Liberavit,

Precor elanguis tedia

Augeat et supplicia

Et nos ducat ad gaudia

Quos creavit.

O livoris feritas,

Que superna rogitas

Et jaces inferius!

Cur inter nos habitas?

Tua cum garrulitas

Nos affatur dulcuis,

Retro pungit sevius,

Ut veneno scorpius:

Scariotis falsitas

Latitat interius.

Det mercedes Filius

Dei tibi debitas!

Fera pessima.