Je suis aussi com cils qui est ravis

Je suis aussi com cils qui est ravis,

Qui n'a vertu, scens ne entendement,

Car je ne sui à nulle riens pensis,

Jour ne demi, temps, heure ne moment,

Fors seulement à m'amour

Et sans partir en ce penser demour.

Soit contre moy; soit pour moy, tout oubli

Fors li qu'aim miex cent mille fois que mi.

Quant je la voy, mes cuers est si espris

Qu'il art et frit si amoureusement

Qu'à ma maniere appert et à mon vis;

Et quant loing sui de son viaire gent,

Je langui à grant dolour:

Tant ay desir de veoir sa valour.

Riens ne me plaist; tout fui, tout ay guerpi

Fors li qu'aim miex cent mille fois que mi.

Einsi lonteins et près langui toudis,

Dont changiés sui et muez tellement

Que je me doubt que n'en soie enhaïs

De meinte gent et de li proprement.

Et c'est toute ma paour;

Car je n'i sçay moien, voie ne tour,

Ne riens n'i puet valoir n'aidier aussi

Fors li qu'aim miex cent mille fois que mi.