Ma chiere dame, à vous mon cuer envoy

Ma chiere dame, à vous mon cuer envoy

Qui vous dira les maus que je reçoy,

La grant doleur, la tristesse, l'anoy

Et le tourment

Qui liement et humblement conjoy

Pour vo gent corps cointe et de bel aroy

Que j'aim cent fois plus qu'autre ne que moy,

Tres loyaument.

Se vous suppli, dame, tres humblement

Que me vueilliés oïr courtoisement

Et avoir soing de mon aligement;

Car, par ma foy,

Sans retollir qui vostres ligement

Et se vous aim si amoureusement

Qu'einsi ne puis endurer longuement,

Se ne vous voy.

Douce dame, se le tres dous espart

Pooie avoir de vo tres dous regart,

Tous seroie garis, se Diex me gart,

De ma dolour.

Mais ce ne puet avenir par nul art

Que j'en aie ne le tiers ne le quart,

Car trop sui loing de vous et, d'autre part,

Vostre douçour,

Vo gentil corps et vo faitis atour,

Vostre biauté, vostre fresche coulour

Ne puis oïr ne veoir par nul tour

Tempre ne tart,

Et vo bonté qui tant vous fait d'onnour

Que vous estes la souvereinne flour

De tous les biens que Diex par fine amour

Aus siens depart.

Mais vraiement, j'ay un noble confort,

Qu'en vous servir et en vous amer fort

Et en espoir me delite et deport

Par Souvenir

Qui me monstre vostre gracieus port

Dont nuls ne puet dire villain rapport.

Là pren je force et vigour et ressort

Contre Desir;

Quar s'il avient qu'il me veigne assaillir,

C'est mes recours: là ne puis je faillir.

Esperence qui ne me puet guerpir

Là pas ne dort

Ne Dous Pensers qui fait à moy venir

Vo gentil corps que je voy et remir;

Ce m'est avis. Là sont tuit mi plaisir,

Là me confort.