Mors sui, se je ne vous voy
G. Machaut
Mors sui, se je ne vous voy,
Dame d'onnour,
Car l'ardour
Qui ma dolour
Acroist en moy
M'ocirra, si com je croy.
Pour vostre amour.
Si ne say que faire doy,
Car riens de nulle part n'oy
Qui ma tristour
Esteingne ne mon anoy;
Et bien say qu'onques mais n'oy
Tel ne gringnour;
Car tant sueffre et tant reçoy
Painne et paour
Qu'adès plour,
Dont tels m'atour,
Seuls en requoy,
Que je ne mengne ne boy
Riens par savour.
Mors sui, se je ne vous voy,
Dame d'onnour.
Helas! si ne say pour quoy
Pitez dort et Bonne Foy;
Car de mon plour
Desirs estanche sa soy
Et Souvenirs avec soy,
Qui sans sejour
Me monstrent vo bel arroy,
Vostre valour,
Vo douçour,
Vo cointe atour,
Vo maintieng coy
Et font qu'à vous tous m'ottroy,
Sans deshonnour.
Mors sui, se je ne vous voy,
Dame d'onnour.
Dame, pour ce me desvoy,
Car quant en vous tous m'employ
Et je n'ay tour
Pour vous veoir, je y congnoy
Ma mort. S'en sui en tel ploy
Que sans retour
Mors sui, car moult bien parçoy
Que ma coulour,
Ma vigour
Et ma baudour
Pers; et ci troy
Font qu'à vous mon cuer envoy.
Plus n'ai de jour.
Mors sui, se je ne vous voy,
Dame d'onnour,
Car l'ardour
Qui ma dolour
Acroist en moy
M'ocirra, si com je croy.
Pour vostre amour.