Ne say comment commencier

Ne say comment commencier

Un tres dous lay

Pour bon Amour mercier

De l'espoir qu'ay

Et pour ma dame au corps gay

Glorefier

Et loer,

Car trop po sçay

Pour telle ouevre edefier.

Pour ce leur vueil supplier

D'umble cuer vray

Que me vueillent ottrier,

Sans lonc delay,

Leur grace, car je n'aray

Bon jour entier

Jamais, se

D'elles ne l'ay,

Où tous me vueil emploier.

Car je ne saroie

Ne porroie

Bien savoir

N'onques valoir,

Se je ne l'amoie.

Je vorroie,

Bien pour voir,

Mort recevoir;

Ne souhaideroie

Ne querrioe

Plus avoir

De tout avoir.

Or pri Dieu qu'en joie

S'arai joie,

Main et soir,

Par leur voloir.

Qu'autrement nul bien ne vueil,

S'il ne vient par leur escueil

Et par leur gracieus vueil,

A cui je sui plus sougis

C'un chiennet devant l'orgueil

D'un lyon, quant il ha dueil

Qu'il n'a pasture en son breuil

Pour ses faonnés petis.

Car il m'ont par bel acueil

Et par un dous riant oueil

Navré, dont pas ne me dueil,

Ains en sui gais et jolis,

Et si liement recueil

Adès, plus que je ne sueil,

Que par souffrir les fleurs cueil

Dont j'espoir estre garis:

C'est bonne esperance,

C'est obeissance,

C'est douce plaisence,

C'est jolie pacience,

C'est deduis, se Diex me gart,

C'est douce aligence,

C'est ma souffisance,

C'est la congnoissance

De la tres noble puissance

D'amour fine et de son art.

N'il n'est desplaisence

Que j'aie ou grevance

En ceste souffrance,

Ains me plaist tant, sanz doubtance,

Que de joie me repart.

C'est ma contenance,

C'est ma soustenance,

Quant fais reverence

A la douce remembrance

Qui de mon cuer ne se part.

Si me fi tant en leur bonté

Et en leur debonnaireté

Que, s'en mon lay qu'ay ordené

Riens mesavient,

De ligier sera pardonné;

Et se croy qu'il prenront en gré

De moy la bonne volenté:

Bien le convient.

Et puis qu'il m'ont tant honnouré

Qu'il m'ont si fort enamouré

Que cuer et corps leur ay donné,

Bien apartient

Que du sens que Dieu m'a presté

Les mercie, qu'en verité

Honnour, joie, pais et senté

D'ellez me vient.

Pour ce, bon Amour,

Par humble clamour,

De cuer, de vigour,

Com mon souverain seignour,

Vous merci

Et remerci

Et vous fais hommage

Quant à vostre honnour

Sers, crien et aour

La rose et la flour

De biauté et de douçour,

Tout en mi

Le cuer de my,

Com vo douce ymage,

Qui là fait demour

Et son dous sejour,

Com tresors en tour;

Et là sa haute valour

Ay servi

Et obeÿ

D'amoureus courage,

Et ser nuit et jour.

Là sont mi retour,

Là sont tuit mi tour,

Là sont mi penser grignour,

Là m'ottri,

Li seule tri,

Là sui en savage.

Mais vous estes tresoriere,

Claseniere

Et portiere

De ceste ymagette chiere

Et de ce righe tresor

Que port à painne legiere.

N'est priere

Qui li quiere

Fors tant que sa grace acquiere,

Car je ne l'ay pas encor.

Nature en fu bonne ouvriere:

Trop l'ay chiere,

Quant sa chiere

Et sa doucete maniere

Resplent plus qu'en soleil or.

De tous biens est coustumiere;

N'est doubliere,

Mais entiere;

N'i faut riens qu'à dame affiere,

Et s'a chief blont, crespe et sor.

Si me vueil de sa biauté taire,

Pour ce que retraire

A point, sans meffaire,

Son gent corps et son bon affaire

Ne porroie en cinc cens mil ans,

Car Nature ne scet mais faire

Un si doulz viaire.

S'i prent exemplaire;

Mais ne fist puis que contrefaire

Qu'elle la fist: tant est plaisans!

Le soleil, qui le monde esclaire

De son luminaire,

A meürté traire

Fait tous biens et les fleurs parfaire,

Tant les petitez com les grans;

Tout ainsi chascun qui repaire

En tres doulz repaire

De la debonnaire,

Il li convient à bien attraire:

Tant soit de faire mal engrans.

Si me doy moult conforter

Et doucement esperer

Joie et deport

De cest ymage que port

Et vueil garder

En mon cuer, servir, loer

Jusqu'à la mort;

Et après seront mi sort

En li amer.

Et quant par li regarder

Voy les milleurs amender,

Ce seroit tort,

Puis que de tout mon effort

La vueil loer

Et dessus tous aourer,

S'aucun confort

N'avoie pour amer fort

Et desirer.

Mais n'endure

Chose dure;

Qu'Esperance la seüre

Doucement

M'asseüre

Qu'en sa cure

Me prendra ma dame pure,

Et briefment.

Ce figure

Sa figure

En mon cuer, si qu'elle y dure

Tellement

Que laidure,

Mespresure

N'i a fors sa pourtraiture

Proprement.

Riens ne desir

Tant com li servir

A plaisir.

Mi desir

Sont là jour et nuit,

Pour desservir,

En lieu de merir,

Li veir,

Li oïr:

A ce Amours me duit.

Miex vueil languir

Pour li, sans mentir,

Et morir

Que joïr

D'autre; c'est le fruit

Dont soustenir

Me vueil et norir.

Là merir,

Là querir

Vueil tout mon deduit;

Si que de son dous dangier

Jamais n'istray,

Car miex ne puis souhaidier.

Pour ce y morray

Et mon temps y useray,

Sans li changier,

N'autre ja mais n'ameray,

Car moult m'en puis avancier.

Or li vueille Amours noncier

Que porteray

Dedens mon cuer sans trichier

Et serviray

Sa douce ymage et l'aray

Plus que moy chier,

Et tant com durer porray,

Ne feray autre mestier.