Puis que ma dolour agrée
G. Machaut
Puis que ma dolour agrée
A la de bonne heure née,
Qui par droit est apelée
Des dames la flour,
Certes, noble destinée
M'avint l'eure et la journée,
Qu'en mon cuer fu engendrée
Si douce dolour.
Si ne plein pas mon labour,
Car ce me samble douçour
Fine et esmerée,
Quant son gracieus atour
Et sa biauté, que j'aour
Par douce pensée,
Et sa face coulourée,
De toute biauté parée,
De douçour enluminée,
Remir en destour,
Sa bonté pure, affinée,
Sa maniere asseürée
Et ce qu'elle est coronnée
De toute valour.
Puis que.
Si sens meint plaisant estour,
Quant sa biauté que j'aour
Ainsi remirée
Est en mon cuer par savour,
Dont en moy parfaite amour
Est enracinée.
S'en yert servie, loé,
Creinte, celé, honnourée
Et parfaitement amée
De moy sans folour,
En esperant qu'arousée
Soit de la douce rousée
De merci la desirée
M'amoureuse ardour.
Puis que ma dolour agrée.
Mais Desirs, qui nuit et jour
M'assaut, l'a par sa vigour
Si fort embrasée
Que tainte en est ma coulour,
Ét ma joie en est menour,
Quant tant a durée.
Mais tant est bien doctrinée,
Douce, humble, simple, senée,
Plaisant, loyal et secrée
Ma dame d'onnour
Qu'en li veoir iert doublée
Ma joie et m'ardeur finée
Et ce fois guerredonnée
Toute ma tristour.
Puis que ma dolour agrée
A la de bonne heure née,
Qui par droit est apelée
Des dames la flour,
Certes, noble destinée
M'avint l'eure et la journée,
Qu'en mon cuer fu engendrée
Si douce dolour.