The bonnie Earl of Murray

Ye Hielands and ye Lawlands,

O whare hae ye been?

They hae slain the Earl of Murray,

And laid him on the green.

He was a braw gallant

When he rade at the ring;

O the bonnie Earl of Murray

He might hae been a king.

O lang may the ladies

Look frae the Castle down,

Ere they see the Earl of Murray

Come riding thro' the town.

Now wae be to ye, Huntley

And wharefore did ye sae?

I bade you to take him,

But forbade you him to slay.

He was a braw gallant

When he rode at the gluve;

O the bonnie Earl of Murray

He was the Queen's luve.