D'où vient, Seigneur
J. de Maletty
D'où vient, Seigneur, que tu nous as espars,
Et si longtemps ta fureur enflammée,
Vomit sur nous tant espaisse fumée,
Voire sur nous les brebis de tes parcs?
Làs! souvien toy de ton peuple acquesté
De si long temps de ce tien heritage
Qu'as achepté et pris en ton partage
De Sion, dy-je, où ton siege a esté.
Debout, Seigneur, vien pour exterminer
A tout jamais la sacrilege bande
Dont la fierté a bien esté si grande
D'oser ainsi ton sainct lieu ruïner.
Là où jadis tes faicts furent chantés,
Là ont jecté leurs cris espouvantables,
Là ont dressé leurs trophées damnables:
Là, dy-je, ils ont leurs trophées plantés.
Chascun a veu travailler ces pervers
A demolir ta saincte forteresse,
Comme au milieu d'une forest espaisse,
Menans la hache à tors et à travers.
Tes beaux lambris taillés tant richement,
Dont ta maison n'agueres fut ornée,
Avec grands coups de hache et de coignée
Sont maintenant brisés entierement.