O Dieu, donne moy delivrance

O Dieu, donne moy delivrance

De cest homme pernicieux:

Preserve moy de la nuisance

De cest homme malicieux.

Luy et les siens qui le ressemblent

Brassent en leur cœur mille maux,

Et me preparent et assemblent

Tous les jours combats tous nouveaux.

Leurs fausses langues outrageuses

Ils affilent comme un serpent,

Et sous leurs levres venimeuses

Venim de vipere s'espand.

Garde moy de la main cruelle

Du meschant, preserve mes pas

De l'outrageux, qui par cautelle

Me veut precipiter en bas.

Les orgueilleux m'ont par finesse

Leurs peiges et rets estendus,

Lors j'ay dit en ferme fiance,

Tu es mon Dieu, ô Eternel,

Veuilles octroyer audience

A ma clameur, Dieu supernel.

Dieu, mon maistre et mes fortes armes,

Pour me garder en tout meschef,

C'est toy qui au jour des alarmes

As couvert et muni mon chef.

N'octroye aux meschans qui me grevent,

Seigneur, l'effect de leurs desirs.

Et ne souffre point qu'ils s'eslevent,

Amenant à fin leurs plaisirs.

Le chef de ceste compagnie

Qui m'enclost, puisse recevoir

Sur soy l'ennuy et fascherie

Que sa langue m'a faict avoir.

Charbons leur tombent sur la teste,

Dieu les abisme tellement

Par sa foudroyante tempeste

Qu'ils n'en relevent nullement.

L'homme pervers en son langage

Sur terre establi ne sera,

L'homme adonné à faire outrage,

Le mal qu'il fait le chassera.

Je sçay que Dieu fera justice

A celuy qui est affligé,

Et qui fait au pure injustice

Un jour par luy sera jugé.

Pour vray ton nom plein d'excellence,

Seigneur, les justes chanteront

Et pour jamais en ta presence

Les droituriers habiteront.