Quand j’ay cuidé les louanges choisir

Quand j'ay cuidé les louanges choisir,

De quel brave excellent personnaige,

Tout aussi tost j'ay changé de language

Pour mes accords de voz vertus remplir:

Mais je n'ay peu mes vers tant enrichir

Ny en mon chant user de tel passaige

Que vré loz dans si petite paige

Se puisse voir ainsi que le desir:

Non seulement de gentil origine

Estes yssu tresorné de doctrine

Prisé de tous grand est vostre renom

Ains encore plus l'heur qui vous accompaigne

Vous rand parfait si que nul desdaigne

Le plus souvant admirer vostre nom.