Happy Dick Dawson

I lo'e ne'er a laddie but ane,

He lo'es ne'er a lassie but me,

He promis'd to make me his ain,

And his ain I surely will be.

He coft me a rokely o' blue,

And a pair o' mittens sae green;

The price was a kiss o' my mou',

And I paid him his debt yestreen.

My mither's ay making a fraise,

And says I'm o'er young for a wife;

But lang e'er she counted my days,

My father had ta'en her for life.

Sae mither just settle your tongue,

And dinna be flyting sae bauld;

For if we're not married when young,

We'll never be married when auld.

"Dear lassie," he cries, wi' a jeer,

"Ne'er heed what the auld anes will say;

"Tho' we've little to brag of, ne'er fear,

"What's gowd to a heart that is wae?

"Our laird has baith honours and wealth,

"Yet see, how he's dwining wi' care;

"Now we, tho' we've naithing but health,

"Are cantie and leal evermair.

He ends wi' a kiss and a smile,

Waes me! can I tak' it amiss,

When a lad sae unpractis'd in guile,

Smiles saftly, and ends wi' a kiss!

Ye lasses wha lo'e to torment

Your lovers wi' fause scorn and strife,

Play your pranks -- for I've gi'en my consent,

And this night I'll tak' Jamie for life.