Killiecrankie

When Willy Pitt, as he thought fit,

Did rule and guide us a', man,

And furious War his iron car

Drove o'er the nations a', man;

Then Buonaparte e'en took a start

To visit Africa, man: --

The Malta knights, those feckless wights,

Resistance made but sma', man.

While on their rocks, the Gallic cocks

Did stoutly strut and craw, man;

The reaver band despoil'd the land,

Took a' their gear awa', man;

Wi' saints of gowd, in siller row'd,

O wow but they were braw, man!

The isles of Greece they next did fleece;

Sic rugging ye ne'er saw, man.

Gie him a bield in that same field

Where Israel gather'd straw, man,

'Twas one to ten but he came ben

As far as Mecca's wa', man.

Our Monarch's nod, like Neptune's rod,

That sways the ocean a', man,

Sent out a fleet their ships to meet,

Near Alexandria, man.

At Aboukir, withouten fear,

As Nelson's line did draw, man,

His hearts of oak their hawsers broke,

They did na wait to jaw, man;

Tri-colour'd flags came down like rags,

Where Nelson's guns did ca', man,

Till glory's light sae drown'd his sight,

'Twas utter darkness a', man!

The Mamalukes came frae their nooks,

To see the low sae braw, man;

On wings of flame, high mounted Fame,

And loud her trump did blaw, man,

'Till Gallic faith, and a' their skaith,

Was kent in Asia a', man;

And Nelson's fame and Britain's name

Rejoic'd and fear'd them a', man.