Lass gin ye lo'e me, tell me now

I ha'e laid a herring in sa't,

Lass, gin ye lo'e me, tell me now;

I ha'e brew'd a forpet o' ma't,

An' I canna come ilka day to woo:

I ha'e a calf will soon be a cow,

Lass, gin ye lo'e me, tell me now;

I ha'e a pig will soon be a sow,

An' I canna come ilka day to woo.

I've a house on yonder muir,

Lass, gin ye lo'e me, tell me now;

Three sparrows may dance on the floor

An' I canna come ilka day to woo:

I ha'e a butt, and I ha'e a benn,

Lass, gin ye lo'e me, tak me now;

I ha'e three chickens and a fat hen,

An' I canna come ony mair to woo.

I've a hen wi' a happity leg,

Lass, gin ye lo'e me, tak me now;

Which ilka day lays me an egg,

An' I canna come ilka day to woo:

I ha'e a kebbock upon my shelf,

Lass, gin ye lo'e me, tak me now;

I downa eat it a' myself,

An' I winna come ony mair to woo.