Logie of Buchan

O Logie of Buchan, O Logie the laird,

They ha'e ta'en awa' Jamie that delv'd in the yard,

Who play'd on the pipe, wi' the viol sae sma';

They ha'e ta'en awa' Jamie the flow'r o' them a'!

He said, think na lang, lassie, tho' I gang awa',

He said, think na lang, lassie, tho' I gang awa';

For the simmer is coming, cauld winter's awa',

And I'll come and see thee in spite o' them a'.

Sandy has owsen, has gear, and has kye,

A house and a hadden, and siller forby.

But I'd tak mine ain lad wi' his staff in his hand,

Before I'd ha'e him wi' his houses and land.

He said, &c.

I sit on my creepie, and spin at my wheel,

And think on the laddie that loo'd me sae weel;

He had but a six-pence, he brak it in twa,

And gied me the ha'f o't, when he gaed awa'.

Then haste ye back, Jamie, and bide na awa',

Then haste ye back, Jamie, and bide na awa';

For the simmer is coming, cauld winter's awa',

And ye'll come and see me in spite o' them a'.