O for ane and twenty, Tam!

Chorus

An' O, for ane and twenty, Tam!

An' hey, sweet ane and twenty Tam!

I'll learn my kin a rattlin sang,

An I saw ane and twenty, Tam.

They snool me sair, and haud me down,

And gar me look like bluntie, Tam;

But three short years will soon wheel roun',

And then comes ane and twenty, Tam.

An' O, for ane and twenty Tam!...

A gleib o' lan', a claut o' gear,

Was left me by my auntie, Tam;

At kith or kin I need na spier,

An I saw ane and twenty, Tam.

An' O, for ane and twenty Tam!...

They'll hae me wed a wealthy coof,

Tho' I mysel hae plenty, Tam;

But hearst thou, laddie, there 's my loof,

I'm thine at ane and twenty, Tam!

An' O, for ane and twenty Tam!...