The east neuk o' Fife

She Auld gudeman, ye're a drunken carle, drunken carle,

A' the lang day ye wink and drink, gape and gaunt;

Of sottish loons ye're the pink and pearl, pink and pearl,

Ill fa'r'd, doited, ne'er-do-weel.

He Auld gudewife! ye're a flytin body, flytin body;

Will ye hae now, but gude be thank'd, the wit ye want;

The puttin cow Should be ay a doddy, ay a doddy,

Mak na sic an awsome reel

She Ye're a sow, auld man,

Ye get fou, auld man,

Fye shame, auld man,

To your wame, auld man,

Sair pinch'd I win, wi' spinnin tow,

A plack to clead, ye're back and pow.

He It's a lie, gudewife,

It's your tea, gudewife;

Na, na, gudewife,

Ye spend a', gudewife,

Dinna fa' on me pell-mell,

Ye like a drap fou-weel yoursel.

She Ye's rue, auld gowk, your jest and frolic, jest and frolic,

Dare ye say, goose, I ever likd' to tak a drappy?

An 'twerena just for to cure the cholic, cure the cholic,

De'il a drap wad weet my mou.

He Troth, gudewife, ye wadna swither, wadna swither

Soon soon to tak a cholic, whan it brings a drap o' cappy;

But twa score o' years we hae fought thegither, fought thegither,

Time it is to gree, I trow.

She I'm wrang, auld John,

Owr lang, auld John,

For nought, gude John,

We hae fought, gude John;

Let's help to bear ilk ither's weight,

We're far owre feckless now to feght.

He Ye're right, gudewife,

The night, gudewife,

Our cup, gude Kate,

We'll sup, gude Kate;

Thegither frae this hour we'll draw,

And toom the stoup atWeen us twa!