The tither morn

The tither morn,

When I, forlorn,

Aneath an aik sat moaning;

I did na trow,

I'd see my jo,

Beside me 'gain the glo'ming,

But he sae trig,

Lap o'er the rig,

And dawtingly did chear me;

When I, what reck,

Did least expect,

To see my lad sae near me.

His bonnet he,

A thought ajee,

Cock'd sprush when first he clasp'd me;

And I, I wat,

Wi' fainness grat,

While in his grips he press'd me;

De'il tak the war,

I late and air

Ha'e wish'd since Jock departed;

But now as glad

I'm wi' my lad,

As shortsyne broken-hearted.

Fu' aft at e'en,

Wi' dancing keen,

When a' were blyth and merry,

I car'd na by,

Sae sad was I,

In absence o' my deary;

But praise be blest!

My mind's at rest,

I'm happy wi' my Johnny:

At kirk and fair,

I'se ay be there;

And be as canty's ony.