The wee wee man

As I was walking all alone,

Between a water and a wa';

And there I spy'd a wee wee man,

And he was the least that e'er I saw.

His legs were scarce a shathmont's length,

And thick and thimber were his thighs,

Between his brows there was a span,

And between his shoulders there were three.

He took up a meikle stane,

And he flang't as far as I could see,

Though I had been a Wallace wight

I coudna liften't to my knee;

O wee wee man, but thou be strong,

O tell me where thy dwelling be?

My dwelling's down at yon bonnie bower,

O will you go with me and see?

On we lap and awa we rade,

Till we came to yon bonnie green;

We lighted down for to bait our horse,

And out there came a lady fine.

Four and twenty at her back,

And they were a' clad out in green:

Tho' the King of Scotland had been there,

The warst o' them might ha' been his queen.

On we lap and awa we rade,

Till we came to yon bonnie ha',

Where the roof was o' the beaten goud,

And the floor was o' the crystal a'.

When we came to the stair foot,

Ladies were dancing jimp and sma';

But in the twinkling of an eye,

My wee wee man was clean awa'.